Surxondaryo viloyatida bu yil 3,5 mingga yaqin fermer xo‘jaligi qariyb 120 ming gektar maydonda g‘o‘za parvarishlaydi. Ayni kunlarda viloyat dehqonlari bahorgi chigit ekish mavsumiga puxta hozirlik ko‘rmoqda.

Mavjud texnika va seyalkalar mavsumga taxt qilib qo‘yildi. Mahalliy o‘g‘it jamg‘arish, shudgorlangan maydonlarni tekislash yumushlari sifatli amalga oshirilayotir.

Sherobod tumanida ham chigit ekish mavsumini qisqa fursatlarda o‘tkazish uchun aniq chora-tadbirlar belgilanib, dala ishlari uyushqoqlik bilan olib borilmoqda.

– 2009 yil hosili uchun 46 gektar maydonga ekilib, bir tekisda baravj o‘sayotgan “Kroshka” navli g‘allaning parvarishiga alohida e’tibor qaratmoqdamiz, – deydi tumandagi «Jo‘ra Rahmatullayev» fermer xo‘jaligi rahbari J.Rahmatullayev. – Jariy yilda 58 gektar yerga chigit qadaymiz. Ekin maydonlaridan mo‘l hosil olish erta bahorda bajariladigan agrotexnik tadbirlarni sifatli o‘tkazishga bog‘liq. Xo‘jaligimizdagi mavjud texnikalar bu tadbirlarni o‘z vaqtida bajarish imkonini beradi.

Malumot olingan joy: O‘zA, X.Mamatrayimov, 10.02.2009