| Toshkent irrigatsiya va melioratsiya institutida navbatdagi bitiruvchilarga diplom topshirildi. Shu munosabat bilan bo‘lib o‘tgan tadbirda institut professor-o‘qituvchilari, jamoatchilik vakillari va bitiruvchilarning oila a’zolari ishtirok etdi.
Mamlakatimizda Prezidentimiz Islom Karimov rahnamoligida yosh avlodni puxta bilimli, mustaqil fikrli, komil shaxslar sifatida voyaga yetkazish masalasi davlat siyosatining ustuvor yo‘nalishi etib belgilangan. Kadrlar tayyorlash milliy dasturi ana shu ezgu maqsadga xizmat qilmoqda.
Mazkur bilim yurti mamlakatimizda qishloq xo‘jaligi sohasi uchun yer tuzish va kadastri, suv xo‘jaligini avtomatlashtirish va mexanizatsiyalash, suv xo‘jaligi melioratsiyasi, suv xo‘jaligi iqtisodiyotini boshqarish kabi yo‘nalishlar bo‘yicha mutaxassislar tayyorlaydi.
Institut o‘quv-laboratoriyasida qishloq xo‘jaligi, ayniqsa, suv tizimida qo‘llaniladigan texnika va texnologiyalarni takomillashtirish, yangilarini kashf etish borasida ham faol ish olib borilmoqda. Ta’lim dargohida ko‘plab tajribali olimlarning faoliyat yuritayotgani puxta bilim va salohiyatga ega mutaxassislar tayyorlashga xizmat qilayotir.
Joriy yilda institutning 787 nafar talabasi bakalavr darajasini olib, mustaqil hayotga qadam qo‘ydi. Ular O‘zbekiston Qishloq va suv xo‘jaligi vazirligi hamda “O‘zbekenergo” kompaniyasi tizimidagi korxona va tashkilotlarda mehnat qiladi.
Manba': O‘zA, Sayyora Shoyeva, 04.07.2009 09:15
|
